زعتريات - الإعلام

بينما كنت جالسا ذات مساء رن هاتف المنزل و دارت المحادثة الآتية
أنا: هلا و الله و غلا بهالصوت، هلا بزعتر باشا
زعتر: باشا عاد، هه ها هه، هلو حبوبي، اشلونك و اشلون الأهل و الجهال
أنا: بخير الله يسلمك، بأحسن الأحوال و لله الحمد
زعتر: خويه ردت أشوف جان بي مجال تمر علي اليوم
أنا: الكراج؟؟
زعتر: لا الشيراتون، هه هه هه، البيت حبوبي
أنا: هلو زعتر أفندي، ها ها ها
زعتر: جنت باشا و هسه صرت أفندي، تجي لو لا؟؟
أنا: تم طال عمرك، ثلت ساعة و أكون عندك
و من بعدها تبادلنا السلام و مضيت متجها إلى منزل زعتر بعد الوقت المحدد، و تقابلنا و جلسنا و زعتر طبعا يحضر الشاي في غرفته في أحد ملاحق السكن
أنا: شغل عدل فيلتك هذي يا زعتر
زعتر: شفت اشلون أحسن من شاليهكم اللي بنيس
أنا: هاهاها، ما تنصاد يا الملعون
زعتر: شغل التلفزيون و اطمش على ما يخلص الشاي
أنا: يا معود، أكو شي يسوى؟؟، الإعلام وايد هابط صار يا زعتر
زعتر: خابط؟!، شنو هاي الخابط
أنا: هابط يا السبع، ماي جليب هو علشان يصير خابط
زعتر: اشرب بس من هالشاي اللي يقند راسكك هسه أنا أقلك ليش اعلامكم صار هابط على قولتك
أنا: قول
زعتر: الإعلام خويه، فكرة، و طريقة توصيل، و قابلية احتواء، و تأثير، و شخصية إعلامية
أنا: كلامك صح، بس وين بتوصل
زعتر: إسال نفسك، شنهي الفكرة اللي يريد اعلامكم توصيلها مو للأوادم لااا للدبش، كل شي ماكو، و شنهي الطريقة اللي اعلامكم يتبعها علشان يظهر بيها بتميز جان بالطرح لو بالهوية؟؟، هم ماكو، يعني اعلامكم ما إله حتى هوية، نوبة دق و رقص و شوي والا واحد يحجي بالدين، تالي يطلع واحد يقول ديمقراطية و حرية و ما يخلص حلقته الا بكل هبقه أكبر من راسه و راس اللي يقابله، عبالك معلم بوليش بس يلمع بالاوادم، تالي أخباركم غبار هنا بركان هناك، فلان راح فلنتان إجا، فلان قص شريط و علان افتتح ندوه، و ختمته بالوفيات و تصبحون على خير، غيره شكو؟؟
انا: ماكو شي
زعتر: لا من تصير عدكم مشكلة سياسية والا شعبية و الا حدث و الا غيره، أردى اعلام يحتويها هو اعلامكم، و الدليل لا بالغزو و لا يوم صارت حرب 2003 جان الواحد منكم يتابع اعلامكم؟؟ كلكم جنتوا اتابعون الاعلام الخارجي، و اعلامكم فشل فشل ذريع حتى باستقطابكم انتوا مو استقطاب غيركم
أنا: هم عدل
زعتر: قلي، يقدر اعلامكم يأثر على الشارع؟؟؟ لا على ستة يلعبون كوت؟؟؟
أنا: هم لأ

زعتر: شوف الشخصيات الاعلامية، أول جان عدكم عايشة اليحيى و أمينة الشراح هسه حليمة خاتون و يا هاي السليمة الثانية صايرين سفراءكم الثقافيين، هم ممثلين و مطربين و مقدمين برامج و كل شي، حتى بالمرقة ينحطون، هم يتكلمون بلسانكم و عن مشاكلكم و عن طموحاتكم، وين مثقفينكم، و ين علماءكم، و ين مفكرينكم، وين سياسيينكم المخضرمين؟؟، صورتكم صارت حليمة خاتون هسه، و الله عيب، لا و هذا بسام أفندي، جان يضحك على اللي يلبسون بناطلين يوم جان يقدم استراحة الجمعة قبل، هسه أبو الحين أقول ما يلبس إلا بدلة، عود صاير موديرن بهلوان أفندي
أنا: ها ها ها هاااي
زعتر: هذا من الفراغ الفكري عند شبابكم، و الا قلي؟ تمثيلياتكم و ممثلينكم و ممثلاتكم الجدد ذني و كتابكم كفو يأثرون على أحد، اشعدهم من فك؟ر، ماكو، بس فساد و خربطة و كل يوم واحد و الا وحده منهم مسوي و ال مسويه لها قصة شكل و الا تافخين حلوجهم و الا باردين خشومهم، الوحدة منهم صارت عقروقه من كثر العمليات، ذولا أصحاب الفكر عدكم، وسفه بس على الكويت و عليكم
أنا: حتى قبل، نسيت هذا اللي طلع يطنز على العالم بسالفة الديودرنت، الإعلامي الكبير ما غيره
زعتر: يابه هذا يفصم حق روحه، انته شكو بيه، دور على المثال الطيب و اقتدي بيه
أنا: كلامك عدل، بس ما قلت لي، اشبغيت فيني
زعتر: هي هي هي، خو ما يخدم بخيل حبوبي
أنا: آمر، عيوني لك
زعتر: خبرك هذا أبو علاء الكردي صاحب الكراج اللي يم كراجنا
أنا: اشفيه
زعتر: ابن اخته جاي يدور شغل، و بما إن اعلامكم أردى من حظي، قلت لهم يشغلونه بالاعلام
أنا: شنو يشتغل؟
زعتر: يقرى الأخبار و هذا مقطع هو مسجله علشان تعرضه على المسؤولين
أنا: خلاص ، أنا أعرضه عليهم و هم يقررون، بس ما أوعدك
زعتر: أعرفك، عسر، مثل اللهوم، تلزق باللهات، لا واسطة و لا بطيخ، خلهم يسمعون بدقة و تركيز لو سمحت و يقررون

فتكفون يا جماعة سمعوا المقطع بتركيز و دقة و قرروا الله يرحم وادينكم، الريال يتوظف و الا ما يتوظف؟