البنجرجي

وقفت بعز الظهر عند كراج راعيه زعتر
شايب اهوازي فقير و صاحبه مصري اسمه عنتر
قال لي اشتامر عليه؟؟، قلت دهن يا الحبيب و فلتر
قال بس؟، قلت اشرايك الموتر نظيف ولا يحتاج أكثر
قام الحبيب و فسر جموم بلسوته الحلي و شَمّر
حاس شوي بالكراج و بحلجه زقاره و صَفّر
قلت له
عندي موتر متهردق من تدقه سلف ترتر
مكربن عتيج كل ما ياني عليه شراي وخّر
إن بغيته ينجطل و إن جطلته يشتغل، عيزان و حلي و مدمّر
قال يابه هذا ينراد له عيني ورور
يكون ترميه براسه بعد ما يقوم يحجي المودر
بس ما قلت لي موترك هاي أزرق لو حمر لو أصفر؟
أمريكي عود هوه لو اوروبي، و الا ياباني المصدر؟
قلت لااااااا، كويتي طال عمرك ، و فل أوبشن و 12 سلندر
قال، تريد تضحك علي شيباتي ؟، ما شفت عدكم مصنع سيارات و الا سنتر
قلت، وين رحت ؟ هذا مجلس أمتنا ، لا هو وانيت و لا هو تنكر
مز مزه من الزقارة ، و طالعني و قال شقلتلي اسمك يابه؟؟؟ عنبر؟؟؟
ضحكت و قلت لأ، أنا بو محمد يا زعتر

قال اسمعني خويه، هذا مجلسكم لأصحاب اكبر العقول حيّر

يابه المسأله ما هي لعب جهال و لبلبي و قيمر

الصوج صوجكم و الخمال من ايدكم، ضيعتوه و لا واحد منكم دوَر

واحدكم يريد يدفن الثاني ويمشي على قبره و يتبختر

و انتوا اخوان بالنهاية و تراب هالقاع لأساميكم سطر

اشرب جايك أغاتي و خلني أبدل الدهن و الفلتر