كالعادة، من يضيج صدري وين أولي، اروح عند صويحبي زعتر أشرب لي عنده قلاص شاي يخليني أضرب الليل بالنهار و لا أخمدوصلت عند بيته و اله الفقير مزهب كل شي، حتى درابيل و غريبة شاري و عقب السلام و القعدة صب الشاي و ناولني القلاص و دنا صحن الدرابيل و الغريبة صوبي، قضبت قلاص الشاي و أخذت نسم زفرته خذت يمكن دقيقة، و هني قال بو فوطن
زعتر: هاااااا، قلبك متروس خويا بو محمد
أنا: قلت إيه و الله يا بو فوطن، الحال لا يرضي لا عدو و لا صديج يا حجي
زعتر: أفا، يا حال بيهم؟
أنا: حالي
زعتر: عيب، أشب الدنيا و أطفيها بنعال و لا يضيج صدرك
أنا: ههههه، نعالك زقاره ما يطفي، الله يرحم والديك، السالفة و ما فيها طال عمرك إن الواحد من كثر ما يلهى بشغله و مسؤولياته ينشغل عن أوضاع الديرة و اخبارها، و كل ما نويت أعرف تحوشني غصه بصدري و أوخر، بس ما أيوز أرد و أقرا و كل ما أغط و أرد أقرا الجرايد، و وقتها تصير الدنيا سلمك الله يا زعتر
خرمس دوم ما تاضي و موحشه كل الأراضي
و صدري من التعب صار من الهوى و النسم فاضي
أصفق يمناي بيسراي و أقول يا رب حكمك علي ماضي
مليت يا اخوي من الخراب و المصيبه إن هو القاضي
لا و أزيدك من الشعر بيت تراه ببلوتي راضي
البدن ما عاد فيه حيل و القلب من نار القهر ناضي
طالعني و قال
أقول الحق و لا تزعل و علي عتاب ما تحمل
قلت خلصني تراني يا يبه ما اتحمل
قال منك، قلت مني؟
أنا شكو بخمال أيادي عساها الشل
قال، مو قلتوا ثلاثي و سويتوا لويه و المجلس انحل
مو راح اللي ما تبونه و الثاني ما عاد طل
و منوا الثالث قلتلي، يا الله غرد يا بلبل
كل يوم تحطون واحد ولا واحد بيكم تفشل
يا اخوي ليش انتوا بساع الأمرعدكم يتبدل
كاهو رجع و اليعارض خشمه بالرمل يتمرغل
قلت
و اشله شغل كل اللي تقوله و كل اللي عليه تتشره
يا اخوي كل هذا عدل و حشا منه ما أتبرا
شلي تبي توصل له من توصف الحال و تتقرا
قول و أنا اسمع و طلع كل اللي بالصدر بره
و لا تحاتي حد(ن) يا اخوي و لا تخاف يوره و شره
دامك تقول كل اللي صار و إن الكلام ما سره
قال
هذا التشيك مصيبه بس تهقى ليش اندفع؟
و هل هو بدعه و الا هو سولة و طبع؟
من زمان و الأمة تقبض و من الأسامي نخترع
ليش أول محد تكلم و ألحين الكل صاير سبع؟
من زمان و هم بالمجلس أشوف محد نطق من الربع
و هذا بو الاستخاره ما قال عنده شك من الوضع
عقب ما قولب الديره و شلع قلوبكم شلع
و تالي قال دليل ماكو و لو اكو من زمان طلع
أشوف طلعه اليوم، و سوه الأمر من البدع
إذا اللي انمسح اسمه أخذ فلوس و بلع
الباجي كلهم باقوا الفرحة من النفس بدلع
ليش ما يقاضي من إجا للمجلس و ترس المخبه و شلع
صاحب التشيك لازم يمشي و هذا هو كل السنع
تريدون تعليم و صحة و سقف الحرية يرتفع
عشم ابليس حبيبي هذا إن الميت سمع
كل يوم بطل و كل يوم فارس و واحدهم لو يصعد على جحش وقع
قلت
بس، تكفا لا تزيد علي يا اخوي الوجع
-------------------------
كل يوم سالفه و كل يوم لويه و كل يوم سواد ويه شكل
من الحكومة و المجلس
الأثنين واحدهم أردى من الثاني
صحتنا انتلفت يايبه قلوبنا نضت خلاص
الله ينتقم من كل من دهور عيشتنا و لعب فيها
